Mehriban Əliyeva – Dövlətə Sədaqətin, Xalqa Qayğının və Yüksək Humanizmin Parlaq Nümunəsi

26 avqust Azərbaycan Respublikasının Birinci vitse-prezidenti, ölkəmizin birinci xanımı, Heydər Əliyev Fondunun prezidenti Mehriban xanım Əliyevanın doğum günüdür. Bu əlamətdar gün Azərbaycan dövlətçiliyinə, xalqımızın milli-mənəvi dəyərlərinə, mədəniyyətinə və humanizm prinsiplərinə uzun illərdir xidmət edən görkəmli ictimai-siyasi xadimin zəngin fəaliyyət yoluna nəzər salmaq üçün mühüm fürsətdir. Mehriban xanım Əliyevanın fəaliyyəti dövlətə sədaqət, xalqa bağlılıq, insanlara qayğı və xeyirxahlıq kimi yüksək mənəvi keyfiyyətlərin vəhdəti ilə səciyyələnir.

1964-cü il avqustun 26-da Bakı şəhərində ziyalı ailəsində dünyaya gələn Mehriban xanım Əliyeva yüksək təhsil alaraq həkimlik peşəsinə yiyələnib. O, 1988-ci ildə İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib, daha sonra göz xəstəlikləri üzrə klinik ordinatura keçib və elmi-tədqiqat fəaliyyəti ilə məşğul olub. Onun tibbi təhsili və insan sağlamlığına xidmətlə başlayan peşə yolu sonrakı illərdə daha geniş ictimai, humanitar və dövlətçilik fəaliyyəti ilə davam edib.

Mehriban xanım Əliyevanın fəaliyyətinin ən mühüm xüsusiyyətlərindən biri insan amilini hər zaman ön planda saxlamasıdır. Təhsil müəssisələrinin yenilənməsi, səhiyyəyə diqqət, mədəni irsin qorunması, uşaqlara qayğı, müxtəlif humanitar təşəbbüslərin həyata keçirilməsi onun ictimai fəaliyyətinin əsas istiqamətləri sırasında yer alıb. Bu fəaliyyətin mahiyyətində insanlara fayda vermək, ehtiyacı olanlara dayaq olmaq və cəmiyyətdə mərhəmət, həmrəylik, xeyirxahlıq ənənələrini gücləndirmək kimi ali dəyərlər dayanır.

Heydər Əliyev Fondunun prezidenti kimi Mehriban xanım Əliyevanın fəaliyyəti xüsusilə geniş miqyas daşıyır. Fond Ümummilli Lider Heydər Əliyevin zəngin dövlətçilik irsinin öyrənilməsi, milli dövlətçilik ideyalarının yeni nəsillərə çatdırılması istiqamətində mühüm missiya həyata keçirir. Bununla yanaşı, təhsil, səhiyyə, mədəniyyət və digər humanitar sahələrdə həyata keçirilən təşəbbüslər Mehriban xanım Əliyevanın fəaliyyətində insanlara xidmət prinsipinin nə qədər mühüm yer tutduğunu göstərir.

Azərbaycanın ərazi bütövlüyü və suverenliyi uğrunda canından keçən şəhidlərimizin ailələrinə, sağlamlığını Vətən yolunda itirmiş qazilərimizə göstərilən ehtiram xalqımızın ən müqəddəs mənəvi dəyərlərindəndir. Şəhid ailələrinin və qazilərin qayğı ilə əhatə olunması dövlətimizin sosial siyasətinin prioritet istiqamətlərindəndir. Mehriban xanım Əliyevanın humanitar fəaliyyətində də Vətən qarşısında misilsiz xidmətləri olan qəhrəmanlarımızın ailələrinə həssas münasibət, onların mənəvi olaraq daim diqqətdə saxlanılması xüsusi əhəmiyyət daşıyır. Şəhidlərimizin xatirəsinə hörmət göstərmək və qazilərimizin yanında olmaq bütövlükdə Azərbaycan cəmiyyətini birləşdirən yüksək mənəvi məsuliyyətdir.

Mehriban xanım Əliyevanın adı Azərbaycan mədəniyyətinin qorunması və beynəlxalq aləmdə tanıdılması istiqamətində görülən mühüm işlərlə də bağlıdır. Hələ 1995-ci ildə onun təşəbbüsü ilə Azərbaycan Mədəniyyət Fondu yaradılıb, 1996-cı ildə isə milli mədəniyyətimizin geniş təbliği məqsədilə üç dildə nəşr olunan “Azərbaycan – İrs” jurnalının əsası qoyulub. Muğamımızın, musiqimizin, tarixi abidələrimizin və zəngin mədəni irsimizin qorunması istiqamətində göstərilən diqqət milli sərvətlərimizin gələcək nəsillərə çatdırılması baxımından böyük əhəmiyyət kəsb edir.

Onun Azərbaycan idmanının inkişafındakı fəaliyyəti də xüsusi qeyd olunmalıdır. Mehriban xanım Əliyevanın Azərbaycan Gimnastika Federasiyasına rəhbərliyi illərində ölkəmizdə gimnastikanın inkişaf imkanları genişlənib, idmançılarımız beynəlxalq yarışlarda uğurlu nəticələr əldə ediblər və müasir idman infrastrukturu formalaşdırılıb. Milli Gimnastika Arenasının istifadəyə verilməsi də bu sahədə görülən böyük işlərin göstəricilərindən biridir. Azərbaycanın mötəbər beynəlxalq idman tədbirlərinə yüksək səviyyədə ev sahibliyi etməsi ölkəmizin dünyadakı nüfuzuna xidmət edən mühüm amillərdən olub.

Mehriban xanım Əliyevanın Azərbaycan mədəniyyətinin, milli dəyərlərinin və humanizm ideyalarının beynəlxalq miqyasda təbliğinə verdiyi töhfələr müxtəlif illərdə nüfuzlu beynəlxalq mükafatlarla qiymətləndirilib. Onun mədəniyyətlərarası dialoqun təşviqi, milli irsimizin qorunması, təhsil və səhiyyəyə dəstək istiqamətində fəaliyyəti Azərbaycanın humanitar siyasətinin dünyada tanıdılmasına mühüm töhfə verib. Bu fəaliyyət eyni zamanda müasir Azərbaycan qadınının yüksək intellektini, güclü iradəsini və cəmiyyətdəki mühüm rolunu nümayiş etdirir.

2017-ci il fevralın 21-də Prezident İlham Əliyevin sərəncamı ilə Mehriban xanım Əliyevanın Azərbaycan Respublikasının Birinci vitse-prezidenti təyin edilməsi onun ictimai-siyasi və dövlətçilik fəaliyyətində yeni və mühüm mərhələnin başlanğıcı oldu. Bu yüksək dövlət vəzifəsində Mehriban xanım Əliyevanın fəaliyyəti milli maraqlara sədaqət, sosial məsələlərə həssas yanaşma və dövlətimizin qarşısında duran strateji məqsədlərə xidmət prinsipləri ilə xarakterizə olunur.

Prezident İlham Əliyevin rəhbərliyi ilə Azərbaycanın keçdiyi inkişaf yolu, dövlətimizin güclənməsi və beynəlxalq nüfuzunun yüksəlməsi hər bir vətəndaşda böyük qürur hissi yaradır. Mehriban xanım Əliyeva da dövlət başçısının həyata keçirdiyi siyasətə dəstəyi, dövlətçilik maraqlarına sədaqəti və çoxşaxəli fəaliyyəti ilə bu prosesdə mühüm rol oynayır. Xüsusilə insanlara yaxınlıq, sosial məsələlərə həssas münasibət və humanitar təşəbbüslərin davamlılığı onun fəaliyyətinin seçilən cəhətlərindəndir.

Bir həkim olaraq insan sağlamlığının nə qədər böyük nemət olduğunu yaxşı bilirəm. Məhz buna görə Mehriban xanım Əliyevanın səhiyyəyə, insanların sağlamlığının qorunmasına və humanitar məsələlərə göstərdiyi diqqəti xüsusi qiymətləndirirəm. Səhiyyənin inkişafı yalnız yeni tibb müəssisələrinin və müasir texnologiyaların mövcudluğu demək deyil. Bu sahənin əsasında insan həyatı, xəstəyə mərhəmətli münasibət, peşəkarlıq və böyük məsuliyyət dayanır. Mehriban xanım Əliyevanın uzun illər ərzində humanizm və insanlara qayğı prinsiplərini önə çəkməsi tibb ictimaiyyəti üçün də yüksək mənəvi əhəmiyyət daşıyır.

Mehriban xanım Əliyevanın şəxsiyyətində ziyalılıq, yüksək dövlətçilik mədəniyyəti, milli dəyərlərə bağlılıq və xeyirxahlıq bir araya gəlir. Onun gördüyü işlərin miqyası müxtəlif sahələri əhatə etsə də, bütün bu fəaliyyətin ortaq nöqtəsi Azərbaycana və Azərbaycan insanına xidmətdir. Məhz xalqa xidmət edən fəaliyyət insan yaddaşında iz qoyur, görülən xeyirxah işlər isə illər keçdikcə öz mənəvi dəyərini daha da artırır.

Bu əlamətdar gündə Azərbaycan Respublikasının Birinci vitse-prezidenti Mehriban xanım Əliyevanı doğum günü münasibətilə ürəkdən təbrik edirəm. Ona möhkəm cansağlığı, uzun ömür, ailə səadəti, tükənməz enerji və Azərbaycan dövlətinin qüdrətlənməsi, xalqımızın rifahının daha da yüksəldilməsi naminə fəaliyyətində yeni-yeni uğurlar arzulayıram. Qoy hər zaman xalqımızın hörmət və ehtiramı, doğmalarının sevgisi və həyata keçirdiyi xeyirxah işlərin bəxş etdiyi mənəvi məmnunluq onunla olsun.

Doğum gününüz mübarək, hörmətli Mehriban xanım!

Dərin hörmətlə,
Respublika Klinik Xəstəxanasının direktoru,
ortoped-travmatoloq Elviz Qasımov

[xfgiven_embed] [/xfgiven_embed] [xfgiven_youtube][/xfgiven_youtube]