Ukrayna və ABŞ sülh sənədi hazırlayıb - Birgə bəyanat

Cenevrədə keçirilən danışıqlardan sonra Ukrayna və ABŞ sülhə dair yenilənmiş və yenidən işlənmiş çərçivə sənədi hazırlayıblar.

Bu barədə Ukrayna prezidentinin və Ağ Evin saytlarında birgə bəyanat dərc olunub.

Bəyanatda Amerikanın sülh təklifini müzakirə etmək üçün noyabrın 23-də Cenevrədə Birləşmiş Ştatlar və Ukrayna nümayəndələri arasında danışıqların konstruktiv, diqqət mərkəzində və qarşılıqlı hörmətlə dolu olduğu, ədalətli və davamlı sülhə nail olmaq üçün ortaq öhdəliyi vurğuladığı qeyd edilib.

"Tərəflər təsdiqləyiblər ki, istənilən gələcək saziş Ukraynanın suverenliyinə tam hörmət etməli və davamlı və ədalətli sülhü təmin etməlidir", - bəyanatda deyilir.

Danışıqlardan sonra tərəflər sülh üçün yenilənmiş və yenidən işlənmiş çərçivə sənədi hazırlayıblar.

Birgə sənəddə deyilir: “Ukrayna nümayəndə heyəti ABŞ-a, xüsusən də şəxsən prezident Donald Trampa müharibəni dayandırmaq və insanların həyatını xilas etmək üçün göstərdikləri sarsılmaz sadiqlik və yorulmaz səylərə görə bir daha minnətdarlığını bildirib.

Ukrayna və ABŞ yaxın günlərdə birgə təkliflər üzərində intensiv işi davam etdirmək barədə razılığa gəliblər.

Avropalı tərəfdaşlarla da sıx əlaqə saxlanılacaq”.

Bəyanatda qeyd olunur ki, bu çərçivə sənədi ilə bağlı yekun qərarlar Ukrayna və ABŞ prezidentləri tərəfindən veriləcək.

“Hər iki tərəf Ukraynanın təhlükəsizliyini, sabitliyini və bərpasını təmin edəcək sülhə nail olmaq üçün birgə işi davam etdirmək öhdəliyini bir daha təsdiqlədi”, - birgə bəyanatda deyilir.

[xfgiven_embed] [/xfgiven_embed] [xfgiven_youtube][/xfgiven_youtube]