Rüfət Sucayev: Qardaşlıqdan strateji müttəfiqliyə uzanan yol - Azərbaycan–Qırğızıstan münasibətlərində yeni dövr

Prezident İlham Əliyevin Qırğız Respublikasına həyata keçirdiyi dövlət səfəri Azərbaycanın Mərkəzi Asiya istiqamətində həyata keçirdiyi uğurlu xarici siyasətin mühüm tərkib hissəsi kimi diqqət çəkir. Son illərdə Azərbaycan ilə Qırğızıstan arasında formalaşan sıx siyasi dialoq, qarşılıqlı etimad və ortaq maraqlar bu səfər zamanı bir daha öz təsdiqini tapdı. Dövlət başçılarının görüşləri göstərdi ki, iki qardaş ölkə münasibətlərini daha geniş məzmunla inkişaf etdirmək və əməkdaşlığı uzunmüddətli strateji əsaslar üzərində qurmaq əzmindədir.

Qırğızıstanda Prezident İlham Əliyevə göstərilən yüksək səviyyəli dövlət qəbulu iki ölkə arasında münasibətlərin səmimiliyini və qarşılıqlı hörmətə əsaslandığını nümayiş etdirdi. Rəsmi görüşlər zamanı əldə olunan razılaşmalar yalnız mövcud əməkdaşlığın davam etdirilməsinə deyil, həm də yeni istiqamətlər üzrə birgə fəaliyyətin genişləndirilməsinə xidmət edir. Bu, Azərbaycan və Qırğızıstan arasında siyasi əlaqələrin dinamik inkişafının növbəti mühüm göstəricisidir.

Danışıqlarda iqtisadi əməkdaşlığın daha da dərinləşdirilməsi əsas prioritetlərdən biri kimi ön plana çıxıb. Tərəflər qarşılıqlı investisiyaların artırılması, sənaye parkları arasında əməkdaşlığın qurulması, kənd təsərrüfatı məhsullarının istehsalı və ixracı, enerji layihələri, rəqəmsal texnologiyalar və innovativ həllər üzrə əməkdaşlığın genişləndirilməsi ilə bağlı fikir mübadiləsi aparıblar. Bu istiqamətlər hər iki ölkənin iqtisadi potensialının daha səmərəli reallaşdırılmasına imkan yaradır.

Regional nəqliyyat və logistika məsələləri də danışıqlarda mühüm yer tutub. Azərbaycanın beynəlxalq nəqliyyat dəhlizlərində oynadığı strateji rol Qırğızıstan üçün də yeni imkanlar açır. Xəzər hövzəsini Mərkəzi Asiya ilə birləşdirən marşrutların inkişafı, Orta Dəhlizin daha səmərəli işləməsi və yükdaşımaların sürətləndirilməsi region ölkələrinin iqtisadi inteqrasiyasına əlavə töhfə verir.

Prezident İlham Əliyevin xarici siyasət kursunda Türk dünyasının həmrəyliyinin möhkəmləndirilməsi xüsusi yer tutur. Azərbaycan və Qırğızıstan bu istiqamətdə ortaq mövqedən çıxış edərək Türk Dövlətləri Təşkilatının imkanlarından səmərəli istifadə olunmasının vacibliyini vurğulayırlar. Ortaq tarix, mədəniyyət və milli-mənəvi dəyərlər üzərində qurulan əməkdaşlıq türk dövlətləri arasında həm siyasi, həm də iqtisadi yaxınlaşmanı daha da gücləndirir.

İkitərəfli münasibətlərin inkişafında humanitar sahə də mühüm əhəmiyyət kəsb edir. Təhsil, elm, mədəniyyət və gənclər arasında mübadilə proqramları xalqlar arasında qarşılıqlı anlaşmanın dərinləşməsinə xidmət edir. Birgə mədəni layihələr, qarşılıqlı tədbirlər və ortaq tarixi irsin təbliği iki ölkənin münasibətlərinə əlavə məzmun qazandırır və gələcək əməkdaşlıq üçün etibarlı sosial baza formalaşdırır.

Qırğızıstanın Azərbaycanın işğaldan azad edilmiş ərazilərində həyata keçirilən yenidənqurma layihələrinə verdiyi dəstək də qardaşlıq münasibətlərinin praktik ifadəsidir. Ağdam rayonunun Xıdırlı kəndində inşa edilən Ayköl Manas adına tam orta məktəb yalnız təhsil müəssisəsi deyil, eyni zamanda dostluğun, qarşılıqlı etimadın və ortaq dəyərlərin rəmzi kimi qiymətləndirilir. Bu layihə iki dövlət arasında humanitar əməkdaşlığın uğurlu nümunələrindən biri hesab olunur.

Azərbaycan və Qırğızıstan beynəlxalq təşkilatlar çərçivəsində də sıx əməkdaşlıq edirlər. BMT, Türk Dövlətləri Təşkilatı, İslam Əməkdaşlıq Təşkilatı və digər beynəlxalq platformalarda qarşılıqlı dəstək iki ölkənin xarici siyasətində mühüm yer tutur. Beynəlxalq hüququn norma və prinsiplərinə hörmət, dövlətlərin suverenliyi və ərazi bütövlüyünün qorunması məsələlərində ortaq mövqe münasibətlərin etibarlı əsasını təşkil edir.

Bu gün Azərbaycan ilə Qırğızıstan arasında əlaqələr yalnız dostluq münasibətləri ilə məhdudlaşmır, strateji xarakter daşıyan hərtərəfli tərəfdaşlıq səviyyəsinə yüksəlib. İmzalanan sənədlər, həyata keçirilən birgə layihələr və siyasi iradə əməkdaşlığın gələcəkdə daha geniş miqyas alacağını göstərir. Bu münasibətlər təkcə iki dövlətin deyil, bütövlükdə Türk dünyasının birliyinin möhkəmlənməsinə də mühüm töhfə verir.

Prezident İlham Əliyevin dövlət səfəri bir daha təsdiqlədi ki, Azərbaycan və Qırğızıstan qarşılıqlı hörmət, etimad və ortaq maraqlara əsaslanan münasibətləri daha da inkişaf etdirmək əzmindədir. Siyasi dialoqun genişlənməsi, iqtisadi əməkdaşlığın güclənməsi, humanitar əlaqələrin dərinləşməsi və beynəlxalq platformalarda qarşılıqlı dəstəyin davam etdirilməsi bu tərəfdaşlığın uzunmüddətli perspektivə malik olduğunu göstərir. Qarşıdakı dövrdə həyata keçiriləcək yeni təşəbbüslər iki qardaş ölkə arasında əməkdaşlığı daha da möhkəmləndirəcək və regionun inkişafına mühüm töhfə verəcək.

[xfgiven_embed] [/xfgiven_embed] [xfgiven_youtube][/xfgiven_youtube]