Rövşən Allahverdiyev: Antalya Diplomatiya Forumu – Azərbaycanın sülh və əməkdaşlıq vizyonunun beynəlxalq təqdimatı

5-ci Antalya Diplomatiya Forumu bu il də dünya siyasətinin aparıcı platformalarından biri kimi diqqət mərkəzindədir. Türkiyə Respublikasının Prezidenti Rəcəb Tayyib Ərdoğanın himayəsi, Xarici İşlər Nazirliyinin təşkilatçılığı ilə keçirilən tədbir “Gələcəyi planlaşdırarkən qeyri-müəyyənliklərin öhdəsindən gəlmək” mövzusu ətrafında dünyanın müxtəlif regionlarından gəlmiş yüksək səviyyəli nümayəndələri bir araya gətirib.

Forumda 150-dən çox ölkədən dövlət və hökumət rəhbərləri, nazir səviyyəsində rəsmilər, beynəlxalq təşkilatların təmsilçiləri daxil olmaqla yüzlərlə iştirakçı qlobal çağırışları və regional prosesləri müzakirə edir. Sessiyalar, panel görüşləri və ikitərəfli danışıqlar çərçivəsində təhlükəsizlik, əməkdaşlıq və gələcək inkişaf istiqamətləri geniş şəkildə analiz olunur.

Azərbaycan bu nüfuzlu tədbirdə yüksək səviyyəli nümayəndə heyəti ilə təmsil olunur. Prezident İlham Əliyevin Forumda iştirakı ölkənin beynəlxalq diplomatiyada artan rolunun və regional proseslərə təsir imkanlarının göstəricisi kimi dəyərləndirilir. Antalya platformasında Cənubi Qafqazdakı vəziyyət, sülh prosesi və yeni əməkdaşlıq perspektivləri xüsusi müzakirə mövzuları sırasında yer alır.

Forum çərçivəsində Prezident İlham Əliyevin müxtəlif ölkə liderləri ilə keçirdiyi görüşlər də diqqət çəkib. Suriya, Şimali Kipr Türk Cümhuriyyəti, Moldova və Pakistan rəhbərləri ilə aparılan müzakirələr ikitərəfli münasibətlərin inkişafına yeni impuls verib. Eyni zamanda Türkiyə Prezidenti Rəcəb Tayyib Ərdoğanla keçirilən görüş Azərbaycan-Türkiyə strateji müttəfiqliyinin daha da gücləndiyini bir daha nümayiş etdirib.

Azərbaycan-Türkiyə münasibətləri tarix, mədəniyyət və ortaq dəyərlər üzərində formalaşmış unikal bir model kimi çıxış edir. “Bir millət, iki dövlət” prinsipi bu əlaqələrin əsas ideoloji dayağı olaraq bu gün də öz aktuallığını qoruyur. İki ölkə arasındakı siyasi, iqtisadi və hərbi əməkdaşlıq regionda sabitliyin mühüm təminatçılarından biridir.

Xüsusilə 44 günlük Vətən müharibəsi dövründə Türkiyənin Azərbaycana göstərdiyi açıq siyasi və mənəvi dəstək bu münasibətləri yeni mərhələyə yüksəltdi. Şuşa Bəyannaməsinin imzalanması ilə isə bu əməkdaşlıq rəsmi müttəfiqlik səviyyəsinə çatdı və strateji birlik daha da möhkəmləndi.

Enerji sahəsində həyata keçirilən birgə layihələr – Bakı-Tbilisi-Ceyhan, Bakı-Tbilisi-Ərzurum, TANAP və Cənub Qaz Dəhlizi – təkcə iki ölkənin deyil, geniş coğrafiyanın enerji təhlükəsizliyinə töhfə verir. Bu layihələr Azərbaycan və Türkiyəni Avropa bazarları ilə birləşdirən strateji körpü rolunu oynayır.

Son illərdə reallaşan İğdır-Naxçıvan qaz kəməri kimi layihələr isə əməkdaşlığın coğrafiyasını daha da genişləndirir və regional inteqrasiyanı gücləndirir.

Antalya Diplomatiya Forumu həm də Azərbaycanın sülh siyasətinin beynəlxalq səviyyədə təqdimatı baxımından mühüm platformadır. Ölkə uzun illər davam edən münaqişədən sonra regionda yeni reallıqlar formalaşdıraraq sülh və əməkdaşlıq gündəliyini irəli aparır.

Azərbaycan və Ermənistan arasında əldə olunan sülh razılaşması regionda uzunmüddətli sabitliyin əsasını qoyan mühüm diplomatik nəticə kimi qiymətləndirilir. Bu proses həm regional təhlükəsizlik, həm də yeni iqtisadi əməkdaşlıq imkanları baxımından böyük əhəmiyyət daşıyır.

Ümumilikdə, Antalya Diplomatiya Forumu Azərbaycanın beynəlxalq arenada sülh, dialoq və əməkdaşlıq təşəbbüslərinin təqdim edildiyi mühüm diplomatik platforma kimi çıxış edir və ölkənin qlobal siyasətdə artan nüfuzunu bir daha nümayiş etdirir.

[xfgiven_embed] [/xfgiven_embed] [xfgiven_youtube][/xfgiven_youtube]