Vasif Ağayev: Qardaşlıq münasibətlərindən strateji müttəfiqliyə aparan uğurlu yol

Azərbaycanın son illərdə həyata keçirdiyi balanslaşdırılmış və praqmatik xarici siyasət ölkəmizin beynəlxalq əlaqələrinin daha da möhkəmlənməsinə mühüm töhfə verir. Bu siyasətin əsas istiqamətlərindən biri də Türk dünyası ilə əməkdaşlığın dərinləşdirilməsi və ortaq maraqlar ətrafında daha sıx inteqrasiyanın təmin edilməsidir. Prezident İlham Əliyevin Qırğız Respublikasına dövlət səfəri də məhz bu strateji baxışın növbəti uğurlu təzahürü kimi diqqət çəkir. Səfər iki qardaş ölkə arasında mövcud münasibətlərə yeni dinamika qazandırmaqla yanaşı, gələcək əməkdaşlığın perspektivlərini də daha da genişləndirib.

Qırğızıstanda Prezident İlham Əliyevin yüksək səviyyədə qarşılanması ölkələr arasında formalaşmış qarşılıqlı etimadın və səmimi dostluğun göstəricisi kimi qiymətləndirilir. Dövlət başçılarının keçirdiyi görüşlər zamanı siyasi münasibətlərin inkişafı, qarşılıqlı maraq doğuran regional məsələlər və ikitərəfli əməkdaşlığın genişləndirilməsi istiqamətində ətraflı fikir mübadiləsi aparılıb. Danışıqların konstruktiv ruhda keçməsi hər iki ölkənin gələcəyə hesablanmış ortaq baxışa malik olduğunu bir daha nümayiş etdirib.

Müasir dövrdə Azərbaycan və Qırğızıstan arasındakı münasibətlər yalnız siyasi dialoqla məhdudlaşmır. İqtisadiyyatın müxtəlif sahələrində qurulan tərəfdaşlıq, investisiya layihələrinin genişlənməsi, sənaye və kənd təsərrüfatında əməkdaşlığın inkişafı iki ölkənin iqtisadi potensialını daha səmərəli şəkildə birləşdirməyə imkan yaradır. Bu əməkdaşlıq həm sahibkarlıq mühitinin inkişafına, həm də qarşılıqlı ticarət dövriyyəsinin artmasına real töhfə verir.

Nəqliyyat və logistika istiqamətində əməkdaşlıq da Azərbaycan–Qırğızıstan münasibətlərinin strateji əhəmiyyətini artıran əsas amillərdəndir. Azərbaycanın Avropa ilə Asiyanı birləşdirən mühüm nəqliyyat qovşağı kimi mövqeyi, Orta Dəhlizin inkişafında oynadığı rol Qırğızıstan üçün də yeni imkanlar açır. Bu istiqamətdə həyata keçirilən birgə fəaliyyət regionda yükdaşımalarının genişlənməsinə, iqtisadi inteqrasiyanın sürətlənməsinə və yeni ticarət marşrutlarının formalaşmasına xidmət edir.

Türk Dövlətləri Təşkilatı çərçivəsində əməkdaşlığın genişlənməsi də iki ölkə arasında münasibətlərin əsas prioritetlərindən biridir. Azərbaycan və Qırğızıstan ortaq tarixə, mədəniyyətə və milli-mənəvi dəyərlərə əsaslanan birlik modelini daha da gücləndirmək istiqamətində ardıcıl fəaliyyət göstərirlər. Türk dünyasının siyasi, iqtisadi və humanitar baxımdan daha sıx inteqrasiyası regionun gələcək inkişafı üçün mühüm strateji əhəmiyyət daşıyır.

Humanitar sahədə həyata keçirilən layihələr xalqlar arasında dostluq münasibətlərini daha da möhkəmləndirir. Təhsil, elm, mədəniyyət və gənclər siyasəti üzrə reallaşdırılan proqramlar gələcək nəsillərin bir-birini daha yaxından tanımasına şərait yaradır. Mədəniyyət günləri, ortaq konfranslar və qarşılıqlı təhsil təşəbbüsləri Azərbaycan ilə Qırğızıstan arasında əlaqələrin sosial əsaslarını daha da gücləndirən vacib amillər sırasındadır.

Qırğızıstanın Azərbaycanın işğaldan azad edilmiş ərazilərində aparılan bərpa işlərinə verdiyi töhfə qardaşlıq münasibətlərinin əməli nəticəsi kimi böyük dəyər daşıyır. Ağdam rayonunda inşa olunan Ayköl Manas adına məktəb təkcə təhsil ocağı deyil, həm də iki dövlət arasında dostluğun, qarşılıqlı dəstəyin və həmrəyliyin rəmzi hesab olunur. Bu layihə Türk dünyasında birliyin real nümunələrindən biri kimi xüsusi əhəmiyyət kəsb edir.

Beynəlxalq təşkilatlar çərçivəsində Azərbaycan və Qırğızıstanın nümayiş etdirdiyi qarşılıqlı dəstək də münasibətlərin strateji xarakterini təsdiqləyir. Hər iki dövlət beynəlxalq hüququn prinsiplərinə, dövlətlərin suverenliyinə və ərazi bütövlüyünə hörmət mövqeyindən çıxış edir. Bu ortaq yanaşma regional sabitliyin və beynəlxalq əməkdaşlığın möhkəmləndirilməsi baxımından mühüm rol oynayır.

Azərbaycanın Mərkəzi Asiya siyasəti son illər daha da fəallaşıb və bu istiqamətdə Qırğızıstan mühüm tərəfdaşlardan biri kimi ön plana çıxır. Dövlət başçıları arasında formalaşmış qarşılıqlı etimad münasibətlərin inkişafına əlavə stimul verir və yeni layihələrin həyata keçirilməsini sürətləndirir. İmzalanan sənədlər, əldə olunan razılaşmalar və qarşılıqlı siyasi iradə əməkdaşlığın uzunmüddətli perspektivə hesablandığını göstərir.

Prezident İlham Əliyevin Qırğız Respublikasına dövlət səfəri iki ölkə arasında əməkdaşlığın yalnız bugünkü vəziyyətini deyil, həm də gələcək inkişaf istiqamətlərini müəyyənləşdirən mühüm hadisə kimi qiymətləndirilə bilər. Strateji tərəfdaşlığın daha da möhkəmləndirilməsi, iqtisadi əlaqələrin genişləndirilməsi, humanitar münasibətlərin inkişafı və Türk dünyasında birliyin gücləndirilməsi istiqamətində atılan addımlar Azərbaycan–Qırğızıstan münasibətlərinin uzun illər ərzində yüksələn xətt üzrə inkişaf edəcəyini aydın şəkildə göstərir.

[xfgiven_embed] [/xfgiven_embed] [xfgiven_youtube][/xfgiven_youtube]